Que di ICANN
Unha institución educativa é UA-ready cando permite que calquera persoa poida estudar, investigar, matricularse, comunicarse ou acceder a servizos dixitais sen que o seu dominio, lingua, grafía ou enderezo de correo se converta nunha barreira.
ICANN sitúa as institucións educativas como un axente clave para facer posible unha Internet realmente multilingüe. A Aceptación Universal garante que dominios e correos válidos -incluídos os dominios internacionalizados, os novos TLD e os enderezos en diferentes linguas ou alfabetos- funcionen correctamente en aplicacións, dispositivos e sistemas.
No ámbito educativo, isto afecta tanto á xestión diaria como á formación: webs universitarias, campus virtuais, formularios de matrícula, correo institucional, repositorios, plataformas de aprendizaxe e sistemas usados por alumnado, profesorado e persoal investigador. ICANN destaca ademais a importancia de preparar webs, aplicacións e sistemas de correo das institucións de ensino superior para seren compatibles coa UA, e tamén de incorporar estes contidos nos plans de estudo.
Para apoiar este traballo, ICANN ofrece formación específica, e dispón dun programa de integración curricular con 12 módulos sobre nomes de dominio internacionalizados, correo electrónico internacionalizado e Aceptación Universal. Estes materiais poden incorporarse a titulacións técnicas ou ofrecerse como formación específica para futuros profesionais dixitais.
